لازينا بالباشمل

لازينا بالباشمل
المكونات :-



شرائح لازانيا
400 جرام لحمة مفرومة
400 جرام سجق
بصل - توم - بقدونس
زيت زيتون
دقيق - لبن - كريمة طبخ (للبشاميل)
2 كوب عصير طماطم
علبة صلصة طماطم
جبن مبشورة ( رومي - فلامنك - شيدر - موتزاريلا )
ورق لورا - زعتر - ملح - فلفل

عشان نجهز اللازانيا في 4 حاجات لازم نعملها
1- سلق اللازانيا
2- الحشو
3- الصلصة
4- البشاميل

ونبدأ بالتفصيل

1- سلق اللازنيا

- بلاش تسلقي اللازانيا أوي يعني يدوب تطرى لأنها بتطرى أكتر لما بتركنيها شوية.
- اسلقي اللازانيا قبل ما تشتغلي بيها على الأقل ساعة عشان تصفي مايتها كويس ومتنزلش مايه وتخلي الحشو صايص.
- أول ماتصفيها من المايه المغليه تغسليها بالماية الحنفية وتحطي عليها زيت كتييير عشان مش تلزق.
- ومن وقت للتاني قلبيها عشان تفكيها من بعض.

2- الحشو :-

نسخن طاسة ونحط شوية زيت زيتون ونقطع 2 بصلة وسط لقطع صغيرة تتشوح



لما تصفر البصلة نحط 6 أو 7 فصوص توم كبار مفرومين



وبعدها ننزل بالسجق ( شيلي الطبقة اللي حوالين السجق ) واللحمة المفرومة



ونهدي النار هاتنزل مايته وتشربه وتستوي وهي بتستوي حطي ورق اللورا والزعتر وظبطي الملح والفلفل وبهارات اللحمة

أول ما تقرب تستوي حطي 3 معالق صلصة طماطم



وقلبيهم كويس وأرفعيه من النار وضيفي عليهم البقدونس المتقطع

ملحوظة مهمة أوي :-
لو الحشوة دي فيها أي سوايل أو زيت أو دهون سايلة صفيها كويس أوي 

وبكده نبقى خلصنا الحشو



3- الصلصة :-

أحلى ما في الصلصة انك تستخدمي الطماطم مش الصلصة الجاهزة بتغير الطعم وبتدي طعم وريحة جنااااااااااااان

(( اضربي الطماطم وصفيها من القشر والبذور حوالي 2 كوب من عصير الطماطم ))

هانسخن شوية زيت زيتون ونحط بصلة صغيرة أوي مقطعة قطع صغيرة أول ما تدبل ننزل ب 4 فصوص توم مفرومين ويتشوحوا شوية وبعدين نحط عصير الطماطم لحد ما المايه اللي فيه تقل بس من ننشف الصلصة،، لأ تبقى طرية وفيها شوية سائل بسيط



وتحطي ملح وفلفل وزعتر

4- البشاميل :-

اعمليه بطريقتك اللي متعوده عليها في حدود 2 كوب لبن ولو عندك كريمة طبخ ضيفي كوبايه منها بتدي طعم أكتر من راااااااااااائع للبشاميل

كده تمام كل حااااااااجة جهزت نبدأ الشغل بقى 


سيـــنيــــــــــــــــه 

نحط في الأول شوية صلصة عشان اللازانيا مش تلزق



وبعدين طبقتين من اللازانيا ( لأن النوع دا رفيع أوي ) وعلى الجوانب زي كده



وبعدين نص كمية الحشو



وحطي رشة من الجبن ( أي نوع جبن ينفع سواء رومي أو شيدر أو فلامنك بس الأحلى الرومي )
أنا بقى دايماً مجهزة عندي في الفريزر كلكشن جبن مبشورة عشان البيتزا
إديها رشة



وبعدين حطي شوية بشاميل قليل أوي مع معلقتين صلصة بس بلاش تكتري مش عاوزين الحشو صايص ومليان سوايل



وبعدين كرري نفس الترتيب السابق
طبقتين لازنيا بينهم شوية صلصة صغيرين
باقي الحشو
رشة جبنة
نتوري شوية بشاميل
معلقين صلصة صغيرين أوي

وآخر حاجة غطي بطبقتين لازانيا كده



وحطي البشاميل على الوش وعليه رشة من كوكتيل الجبن